تهنئه للإخوه المسيحين

بسم الوطن .. يتقدم : عبدالرحمن فارس بخالص التهاني للإخوه للمسيحين شركاء الوطن بمناسبة عيد القيامه وعلى المقيمين خارج الوطن مراعاة فروق التوقيت ... ومتنسوناش في اللحمه :)

حدث في مثل هذاليوم .. يوم ميلادي يوم ميلاد لشعبي

تحديث يوم الجمعه 10/4/2009
حدث في مثل هذا اليوم ... فرحت الشعوب وسعدت فاليوم عيد ،، فيوم ميلادي يوم ميلاد لشعبي ،، فزينوا اعيادكم بالهدايا والمسجات ،، والرنات لا .. هنيئا لكم بسعادتي ... وقد قررنا منح الولاه المهنئين لي بحبس يومي الخميس والجمعه ، اكيد ليا في ذلك حكمه
...............
يوم الخميس 9/4/2009
النهارده وقفة عيد ميلادي ..بعد استطلاع ليوم مولدي بكل الوسائل المتاحه سواء بالعين المجرده أو بشهادة الميلاد أو بسؤال أهل الثقه، ثبت لدينا بما لا يدع مجال للشك أن غد الجمعه الموافق 10 ابريل هو يوم ميلادي ،،، :D

..........
أجمل وأول هدية وصلتني
شكرا ملاك

عدنا

عدنا ،،، وللحرية ثمن ،،، نزف الى الأمه التدوينيه خبر عودتنا بعد الفاصل ومش أي فاصل:) ،،، إلى نكفور أمن الدولة : الجاوب ما ترى لا ما تسمع !!!

فارس إفراج

الإفراج عن المدون فارس فجر أمس


إنتهى

فارس إخلاء .. ولا معلومات عن مكانه

المدون فارس مع الاسير مجدي حسين




عبدالرحمن فارس اخذ إخلاء سبيل من النيابة


ولا نعلم حتى الآن موقف
جهاز إرهاب الدولة -آآآخخخخ اقصد- (أمن الدولة) منه

الحرية لفارس

إعتقال محرر المدونة عبدالرحمن فارس

إعتقال المدون عبد الرحمن فارس من منزله ليلة أمس الخامس من إبريل

على خلفية دعوته لإضراب السادس من إبريل

وهو الآن بالنيابة وأعلن إضرابه عن الطعام

الحرية لفارس

الحرية لساره وامنيه

الطالبتين ساره رزق وامنيه طه المعتقلتين على خلفية الدعوه لاضراب 6 ابريل من جامعة كفر الشيخ
----------
تم القاء القبض عليهم يوم 1 ابريل وتامر النيابه بحبسهم اربعة ايام على ذمة التحقيق
ثم جددت لهم النيابه الحبس اليوم السبت لمدة 15 يوم
-------

تهديد عبر الفيس من عدة ايام ... واليوم استدعاء لأمن الدوله

مع بداية شهر ابريل ومع انتظار الحدث الأهم وهو الاضراب القادم يوم السادس من ابريل وصلني اليوم استدعاء لامن الدوله

لا ادري ان كان الامر مرتب أم لا أم هي محض صدفه ولا ادري انا كان ما قمت به الان من نشر هو من الصواب ام لا
لكن وصلني اليوم الثلاثاء الساعه 12.30 ونص بعد منتصف الليل استدعاء لأمن الدوله يطلبني للحضور لأمن الدوله يوم الأربعاء الموافق 1/4/2009 الساعه الثانيه ظهرا

منذ عدة ايام دار حوار بيني وبين أحد الموجودين عندي في قائمة الأصدقاء على الفيس بوك ،، شخص مجهول لم أعرفه من قبل بدأ الحورا عبر استيتيوس كنت قد كتبتها في الفيس بوك عن اضراب 6 ابريل وتضامني معه ، وكانت تعليقاته تصب في أننا مجموعه من المخربين والاثمين والخارجين عن الحاكم وان مبارك رئيس شرعي وكلام من هذا القبيل ولما لم يجد جدوى من الحوار عبر التعليقات دخل الي يحاورني عبر صندوق الشات بالفيس بوك ودار حوار ساخن جدا ولما وجدني مقتنع بكل ما اقوله قال لي كلمتين (متزعلش من الي هيحصلك النهارده ) وقمت بأخذ صوره للشاشه هوقتها بالبرنت سكرين ،، وبعدها لقيته حذفني من القائمه

ولكني وقتها لم أتحدث الى أحد بهذا الأمر لأني لا أحب الشوشره ولكن عندما جد جديد وجدتني مضطرا لهذا ...

دي صورة التهديد

لمشاهدة الصور بحجمها الطبيعي افتحها في لسان جديد أو احفظها على جهازك


)1(

(2)

دي التعليقات الي كانت في الصفحه عندي في الفيس بوك

(1)

(2)

دا جزأ من الحورا قدرت احتفظ بيه ، دار بيني وبين الشخص صاحب التهديد

AbdElrahman

وهحس اني ظالمه بجد

اخص عليا

اخص فوخص كمان

1:52pmIbrahim

اخص عليك انك مش فاهم

وبتتكلم عن حجات من غير متسئل

1:52pmAbdElrahman

يقطعني هو انا كنت ظالم مبارك كده

1:53pmIbrahim

وبترردد كلام الناس فى الشارع

اللى هما جيبينوا من ناس بره

1:53pmAbdElrahman

هو انت متعرفش ان انا من الشارع ولا ايه

1:53pmIbrahim

عشان تزعزع الامن والاستقرار

1:53pmAbdElrahman

منا لسه قايلك اني بقبض من بره

عشان ازعزع الاستقرار

1:54pmIbrahim

مش انت اللى كنت عايز حماس تضرب اسرائيل

اتفضل ياعم

سمعوا كلامك

وضيعوا

1500

1:55pmAbdElrahman

اه مهو اصل انا الي قلتلهم اصل كنت دافعلهم فلوس كتيره من الي بقبضها من بره

1:56pmIbrahim

يمكن اتكلم راجل زى مبكلمك ورد عليه

مش ده كان رايك

1:56pmAbdElrahman

وجبت هنيه وقلته بقولك ايه يا ولد استاذ ابو العبد هنيه خد القرشين دول واضرب اسرئايل لزوم زعزعة الاستقرار

1:57pmIbrahim

لما تعرف يعنى ايه حرب ابقى اتكلم

1:57pmAbdElrahman

وبعدين احنا كنا بنتكلم على الزعيم والقائد والملهم حسني مبارك

1:57pmIbrahim

وتعرف يعنى ايه جوع ابئى صوت

1:57pmAbdElrahman
ايه الي دخلنا على حماس

1:57pmIbrahim

لا اصل انا كنت بئرى رايك

وبستعجب

وبقول ده لو مسكها هيضيعنا

الحرب مش صياعة

1:58pmAbdElrahman

طب هجوع ازاي وانا في عهد الرئيس بارك الرب خطاه

اه الحرب مش صياعه لكن هز ....

اكتاف


1:59pmIbrahim

مدام ابتديت تتكلم ووتنئوز سورى زى النسوان كدة

انا هسيبك ترجع راجل وتكلمنى سلام

انا عندى الحجج

وانت ولاعندك حجة واحدة

1:59pmAbdElrahman

هو مبارك قالك تشتم الي قدامك

1:59pmIbrahim

روح ادرس واتكلم

1:59pmAbdElrahman

انا مغلطش فيك

2:00pmIbrahim
منت سورى بتكلمنى كان اتنين نسوان

واقفين مع بعض

2:00pmAbdElrahman
انا لو غلط يبقى غلط في مبارك وهو اظن ان هو راجل يعرف يدافع عن نفسه

برضه مش هرد عليك

عشان بره قالولي متردش على الي يشتمك

2:01pmIbrahim

وجوه قالولى اننا متكلمشى مع النسوان اللى زيك اللى اول ميجى البوليس يجروا ولما بيدخل الامريكان انت عارف بيعملوا ايه

سلام

2:01pmAbdElrahman
وهقولك زي ما المسلمين الي انا منهم بيقولوا ... الله يسامحك

2:01pmIbrahim

وانا هؤلك بردوا المسلمين اللى انا منهم

واذا خاطبهم الجاهلون قالوا سلاما

سلام

وربنا يكفينا شرك

2:02pmAbdElrahman

امين

2:02pmIbrahim

انت واللى زيك فى بلدنا

2:02pmAbdElrahman

ايوه المخربين


Ibrahim is no longer online. The following was not sent:

الي زينا (send as a message)

2:03pmIbrahim is online.
2:04pmIbrahim

ومتزعلشى من اللى هيحصلك انهاردة

سلام


2:04pmAbdElrahman

Could not connect to Facebook Chat at this time.

هههههههههههههههه

ياما ياما خفت

2:05pmIbrahim is offline

2:05pmAbdElrahman

You don't have permission to chat with this person.

يوه بقى خضتني ياسمك ايه


................................................

دا رابط صفحة الفيس بوك الخاصه بالشخص المدعوا ابراهيم

وهذه صوره للمدعو ابراهيم صاحب الحوار

معدش فيه وقت باقي 6 أيام على الاضراب

أكيد أنت معايا أن وقت الكلام أنتهى و جه الوقت اللى لازم نقف كلنا أيد واحدة ونقول كفاية نقول للظالم عندك أحنا مش خايفيين
من 28 سنة وأحنا ساكتين عملنا أيه بسكوتنا ؟؟؟ ضيعنا أرواحنا وولادنا وحقوقنا والأهم أن حتى مصر ضاعت بسببنا قولى كده فاضل أيه من مصر!!! أرضها أغتصبها المستثمرين الأجانب ورجال الأعمال الكبار ومصانعنا أتخصخصت وأتسرح عمالها . حتى القمح بنستورده من أمريكا والقطن من أسرائيل . طيب قولى كمان فاضل أيه من شعب مصر غير الذل والخوف والفقر والفساد .فاضل أيه غير ناس خايفة ومقهورة وشباب ماسخ نسى بلده ودينه مش عارف يتعلم ولا يشتغل ولا حتى يحلم !!!! دى نتيجة سكوتنا بلد ضاعت وشعب ممسوخ ضيع حقه بأيده
زى اليومين دول السنة اللى فاتت وجه عمال المحلة دعوة للشعب المصرى لاضراب عام ودلوقتى لازم نكرر الدعوة بنقولك 6 ابريل 2009 اضراب تاني لشعب مصر
لأهالى سراندو لعمال كفر الدوار لكل محامى ومدرس ومهندس لكل طالب فى مصر لأهالى المعتقلين لكل شاب وفتاة ذاقوا مرارة الضرب والتعذيب فى أقسام الشرطة لكل مصرى عايز حقه

متروحش الشغل , متروحش الجامعة , متروحش المدرسة

ما تفتحش المحل ,ماتفتحش الورشة

بلاش تنزلى السوق , أمتنعى عن الشراء

عايزين مرتبات تعيشنا

عايزين تعليم لأولادنا وشغل للعاطلين

عايزين ما ناخدش على قفانا

عايزين سكن للي عايشين في الشوارع

عايزين مستشفيات تعالجنا ودواء لأطفالنا

عايزين عدل وحق وحرية

عايزين نبنى ونزرع ونصنع

عايزين نحاكم اللى سرقونا وجوعونا وذلونا

عايزين دستور يحمينا ومصر ترجع لينا

مش عايزين محسوبية ولا ضباط بلطجية

مش عايزين رفع أسعار ولا تعذيب فى الاقسام

مش عايزين كلام فى الهوا ولا وعود مزيفة

مش عايزين معونة من أمريكاولا جات مع أسرائيل


أوعى تقولى ده حرام الأضراب سلمى يعنى مفيش تكسير ولا تخريب دى بلدنا وأحنا اللى نحميها وياريت الداخلية تقوم بدورها وتحافظ على الأرواح والممتلكات بدل ضرب المتظاهرين فى الشوارع
عارف حتقولى ده معصية لأولى الأمر حأقولك أفتح كتاب العربى بتاع أبنك اللى فى الأعدادى حتلاقى خطبة سيدنا أبو بكر الصديق رضى اللع عنه بعد توليه خلافة المسلمين (لقد وليت عليكم ولست بأفضلكم فاذا أسات فقومونى) ده أبو بكر أحد المبشرين بالجنة مش الحاكم بأمره مبارك

حتقولى خايف حتفضل خايف لأمتى أنت عارف أن عمال غزل المحلة حيشاركوا فى الأضراب حتى أهالى معتقلى المحلة رغم اللى حصل لأهلهم برضه مضربين يوم6 أبريل عارف ليه!!!لأن الحق لايمنح بل ينتزع

بتقول مفيش فايدة مين قال كده الأضراب هو تسجيل لأعتراضنا على الأحوال السيئة اللى بنعيشها ونجاحه يعتمد على مشاركة كل فرد فيه يعنى متقولش وأنا مالى وبعدين تسأل الأضراب فشل ليه؟؟!!!
ونروح بعيد ليه أضراب السائقين والصيادلة والأداريين والمحامين أيه اللى حصل فيه الأول الحكومة زعقت وقالت وأنا مالى وبعدين لما دخلوا فى الجد رفعت الراية البيضا وقالت حنرجع القوانين لمجلس الشعب صحيح هى بتتعامل معانا اننا سذج ومش فاهمين لعبتها القذرة أن كل القوانين تتحول لمجلس الشعب وتفضل فى مداولات لبعد الاضراب وبعدين يضرب النظام ضربته لكن الشعب خلاص بقى واعى وفاهم الحركات دى كويس
متقولش وأنا مالى ومتقولش اللى حيجى بعده حيكون أسود منه وليه !!!! ليه مش أحنا اللى نختار اللى عايزينه مش ده حقنا

يا أهالينا لكل ظالم نهاية أقفوا مرة وطالبوا بحقوقكم فى شباب كتير قدروا يغيروا بلدهم وأحنا مش أقل من حد

ياأمى يا أبويا يا أخواتى يا حبيبتي ضموا علينا عشان حقنا يرجع , كفاية خوف كفاية فساد كفاية ذل كفاية خنوع

رزقنا بأيد ربنا حياتنا بأيد ربنا فكر فى ربك فكر يوم القيامة حتقول أيه لمايسألك أنت فرطت ليه ؟؟ سكت عن الحق ليه؟؟ ضيعت حقك ليه؟؟ ضيعت حق ولادك ليه؟؟؟ حيقولك خلقتك عشان تصلح الأرض سكت على فسادها ليه؟؟؟!!!!
لوأنت حتقدر تتحمل عذاب ربك احنا مش حنقدر عشان كده لو مش حتكون معانا أياك تكون ضدنا

6 ابريل 2009 ------------ نقدر

أطبع المنشور ووزعه

ابعت رسايل على الموبايل لاصحابك

أكتب على العملات الورقية

http://www.facebook.com/group.php?gid=9973986703
http://shabab6april.wordpress.com

يوم 6 ابريل 2009 .. يوم الغضب ... بس هانعمل إيه

من حق جيلنا أن يجرب .. فإما أن ينجح .. أو يقدم تجربه تستفيد بها الاجيال الاخرى

يوم الغضب و الاضراب ... 6 ابريل

لقد كان يوم السادس من إبريل في العام الماضي يوما فارقا في التاريخ المصري الحديث حيث انتفضت الجماهير المصرية ضد غلاء الأسعار الناتج عن سياسات هذا النظام الفاسد المستبد وقد تكلل هذا اليوم بانتفاضة أهالي المحلة المباركة ضد عصا الأمن العمياء .. بدأت دعوة الإضراب من عمال شركة غزل المحلة للغزل والنسيج وتضامن مع هذه الدعوة شباب 6 إبريل وكافة القوى الوطنية فقمنا بنشرها على نطاق واسع من خلال كافة المواقع والمنتديات على شبكة الانترنت ومن ضمنها جروب الفيس بوك الذي اشترك فيه عددا هائلا من الشباب تجاوز السبعين ألفا.

وتعيش مصر هذه الأيام في ظل حالة غليان واحتقان شعبي عام ضد الظروف الاقتصادية بالغة السوء التي يتعرض لها المواطن المصري البسيط حيث يتعرض بشراسة لعملية إفقار منظمة من قبل الدولة وتوزيع غير عادل للثروة القومية التي تحتكرها قلة من رجال الأعمال والمنتفعين بسياسات الحزب الوطني اللاديمقراطي مما أدى إلى جعل أغلبية المصريين تحت خط الفقر ،وأصبح المواطن يحيا في ظل متناقضات كثيرة فيرى طائرات رجال الأعمال بينما يغرق في عبارة الموت أو يُحرق في قطار الصعيد .. يرى فيلات وقصور مارينا وشرم الشيخ بينما تنهار فوق رأسه ورأس أبنائه عشش الدويقة ، يعاني المواطن من قلة وندرة فرص العمل والتي وإن وجدت فلا يوفر له دخلها المتطلبات الأساسية لحياة الإنسان كالمأكل والملبس والمسكن والحياة بكرامة واطمئنان على مستقبله ومستقبل أبنائه، يعاني المواطن من تدهور واضح في الخدمات الأساسية كالتعليم والصحة وارتفاع تكاليفها مما يحمله طاقات فوق مرتبه البسيط إن وجد !

ومنذ السادس من إبريل الماضي انتشرت موجة واسعة من الاضرابات المطلبية في كل أنحاء البلاد تجاوزت الألف إضراب حتى ديسمبر من العام الماضي وإيمانا منا بأنه لن تحقق أي فئة مطالبها وحدها بمعزل عن باقي فئات الشعب المصري حيث أن المشكلة الرئيسية التي تواجه تقدم هذا الوطن وتحقيق قدر معقول من الحياة الكريمة لمواطنيه هي الفساد والاستبداد اللذان خلقا على يد هذا النظام القابع على صدورنا يمتص ثروات البلاد ويجرف الأصول الانتاجية ويمارس القهر السياسي والكبت العام للحريات والتزوير المنتظم لكل الانتخابات سواء التشريعية والنقابية وحتى اتحادات الطلاب وإنه لا بديل لإصلاح هذا الوطن إلا بالتخلص من عصابة الفساد والاستبداد التي تغتصب السلطة وتنهب ثروات الوطن منذ أكثر من ربع قرن من الزمان .. لذا فإننا ندعو الشعب المصري العظيم بكل فئاته وهيئاته وقادة الاحتجاجات العمالية والنقابية إلى جعل يوم 6 ابريل القادما يوما للغضب و الاضراب لكل شعب مصر كأحد الخطوات الرئيسية على طريق الاضراب العام والعصيان المدني السلمي والذي نراه طريقا رئيسيا للتغيير وللخلاص من حكم هذا النظام الفاسد.



ولتكن مطالبنا في هذا اليوم :

أولا : حد أدنى للأجور 1200 جنيه بما يضمن أن يحيا المواطن بكرامة ويشعر بالأمان على مستبقله ومستقبل أبناؤه.

ثانيا : ربط الأجور بالأسعار

ثالثا : انتخاب جمعية تأسيسية لوضع دستور جديد للبلاد يضمن الحريات السياسية والنقابية ويحدد فترة الرئاسة بمدتين على الأكثر.

رابعا : وقف تصدير الغاز ” لإسرائيل “

منذ اليوم انتهى عهد الصمت والخضوع للذل والفساد .. شارك في يوم الغضب من أجل أبنائك .. من أجل حياة كريمة لكل مواطن .. من أجل مستقبل وطننا

هانعمل ايه لغاية يوم 6 ابريل القادم
====================

1- ابعت لينك الجروب ده لكل زمايلك على الفيسبوك
http://www.facebook.com/group.php?gid=14512307242
2- اكتب توبيك و اكتب الدعوه و لينك الجروب فى كل الجروبات اللى مشترك فيها على الفيسبوك
3- اكتب توبيك و اكتب الدعوه و لينك الجروب فى كل المنتديات و كل المواقع اللى تعرفها
4- ابعت لينك الموقع و المدونه و الجروب على الايميل لكل صحابك
5- ضحى بعشرين جنيه و ابعت رسايل لكل اللى متسجلين عندك على التليفون
6- هات طباشير او اسبراي و اكتب على اى مكان تلاقيه ينفع
7- اكتب على الفلوس اللى معاك عباره واحده
اضراب 6 ابريل 2009 .. حقنا و هناخده
8- اتكلم مع كل صحابك و قرايبك و اقنعهم بالفكره و اقنعهم بضرورة عمل احجتجاجى للضغط على الحكومه
9- افتح حوار عفوى و انت راكب اى مواصله و اتكلم انك سمعت من الناس عن اضراب 6 ابريل 2009


هانعمل ايه يوم 6 ابريل
=============

1- لو طالب يبقى روح الجامعه بس إعمل اضراب عن الدراسه و قاطع حضور المحاضرات .. و طالب مع زمايلك فى اليوم ده
بحقوقك المشروعه فى التعليم

2- لو موظف يبقى تروح شغلك أو مصنعك و تعلن اضرابك عن العمل و تدعوا باقى الموظفين للاضراب حتى يتم اجابة مطالبكم الفئويه

-3 ممكن تشترك فى التظاهرات السلميه اللى اعلن عنها فى القاهره و انتظر اعلان المحافظات .. و ممكن تنظم مع المتحمسين للفكره أى وقفه احتجاجيه سلميه فى اى ميدان لعرض أى مطالب

4- جمع اهل منطقتك و جمعوا مطالبكم و مشاكلكم و اطلعوا بيها على مقر الحى او الوحده المحليه او المحافظه و طالب بحقوقك المشروعه بصوره سلميه

5- لو مش طالب ولا موظف أو لو مش هاتعرف تعمل اللى فات.. يبقى خليك فى البيت

6- اثناء نزولك فى الشارع او مشاركتك فى الانشطه او لو حتى مش هتشارك .. يبقى البس اسود فى اليوم ده

7- تعلق علم مصر على البلكونه

8-متشتريش اي حاجة اليوم ده

9- تابعنا باستمرار علشان تعرف اى انشطه جديده

للمزيد من المعلومات

الجروب الرئيسى
http://www.facebook.com/group.php?gid=9973986703

مدونة شباب 6 ابريل
http://shabab6april.wordpress.com


المجموعه البريديه لشباب 6 ابريل نرجوا الاشتراك الآن
http://groups.yahoo.com/group/shabab6april/