كله إلا الملابس الداخلية يا حكومة

شركة تافارون ـــ أكبر شركة إسرائيلة لصناعة الملابس الداخيلة بتتفاوض مع الحكومة المصرية لتسويق منتجاتها في السوق المصري ..
حتى الأندر وير عايزين يحتلوه ، فضلنا احنا ايه بقى
وبعدين نجيب منين مناضلين يخلصونا من الإحتلال دا ، وايه نوع السلاح اللي هنستخدمه في الحرب دي
ونجيب منين قائد للضربة الأندرويرية
وبعد ما ننتصر يا ترى القائد هيروح يلقي خطابة في حمام الكنيست الإسرائيلي ولا ايه بالظبط
حد يفهمنا يا جدعان
كله إلا المنطقة دي
دي منطقة مستقبل

* ملحوظة واعتذار
أنا نادرا لما بحط موضوع من غير صوره تعبر عنه ، لكن في الموضوع دا ملقتش صورة مناسبة تناسب الجميع
فا أنا بعتذر عن هذا التقصير الإجباري

المدون المعتقل كريم عامر كل سنة وانت طيب

تهنئه للمدون كريم عامر الذي يطفئ شمعته الخامسة والعشرون في السجن الذي يقضي فيه عقوبة بالحبس لمدة أربع سنوات بدأت في العام 2006 بسبب كلمات كتبها علي مدونته واعتبرها المسئولين وجهاز الأمن إهانة لرئيس الجمهورية وإساءة لمصر

يقضي كريم الحكم في سجن برج العرب بالإسكندرية و يتعرض لسوء المعاملة مقترنة دائماً بعبارة "حتى "ترجع عما في رأسك" كما يتعرض لاضطهاد منظم من قبل ضباط السجن ..

كل سنه وانت طيب وحر يا كريم

شكلها كده فعلا حكومة خنازير بنت ......

بشرى للشعب المصري العظيم عامة والي هيموتوا بإنفلونزا الخنازير خاصه ، متحملوش هم الدفن بعد الموت ..( ورد بـ«المصرى اليوم» : « كشف مصدر مسؤول بوزارة البيئة أن لجنة عليا من جهاز استخدامات أراضى الدولة التابع لمجلس الوزراء، بالتعاون مع وزارات البيئة والصحة والزراعة، قامت، أمس، برصد مساحات الأراضى المناسبة التى تصلح لتخصيصها كمقابر جماعية فى حالة تفشى الوباء، وحدوث وفيات على نطاق واسع، موضحًا أن هذا الإجراء يأتى ضمن بنود الخطة الحكومية لمواجهة الوباء». )


طب نرد على أم الحكومة دي وعم نظيف الي مبانش عليه إنه شافها نقول ايه ...
يعني بقى هو دا مقامنا عند الحكومة الموقرة ورئيسها
مقامنا انهم يوفروا لينا تربة ندفن فيها كتر خير الحكومة
طيب أبو علاء
احب اقولك بقى ياريت حضرتك تفضل محافظلنا على التربة دي لحد ما نموت لحسن يجي رجل أعمال خنازيري ياخدها ونموت في الشارع
مهو اصله مينفعش سيادتك نعيش في الشارع ولما نومت نموت برضه في الشارع

وعشان البشرى تكتكمل أحب أقول أن الحكومه بدأت تاخد خطوات جاده جدا
لجنة عليا لتحديد أماكن المقابر الجماعية

ومن هنا بحب أشكر الراجل الوحيد الي حاول يعمل حاجه بجد للموضوع دا الفنان شعبان عبدالرحيم الي عمل أغنية يواجه بيها انتشار الوباء ألف شكر ليك يا أبو عصام

نكتفي بهذا القدر ....

ااااه قبل ما أكتفي بالقدر الي فات أحب أنوه عن حاجه اتفكرتها
إن المحروس وكيل الأزهر السابق أفتى فى مسألة الدفن الجماعى بأن يكون دون كفن أيضاً

يعني من النهارده مفيش واحده تنام وهي لابسه حاجه أحمرا أوبنفسجا أو شفتشي ولا حتى تلبسه وهي صاحية عشان كله هيدفن جنب بعضه ومن غير كفن يبقى شكلها ايه بقى لو ادفنت جنب راجل غريب بالأحمرا وجوزها شافها

مدونتي تعلن أنها على أتم الإستعداد لإستقبال أي كم من التعليقات التي تحتوي على بذائات دون الرقابة عليها وأعلن مسؤليتي الشخصية عن كل كلمة اتقالت وهتتقال في المدونة


وربنا يكون في عون الشعب المصري العظيم الي مش عارف هيلاقيها من إنفلوانزا الطيور ولا الخنازير ولا حكومة الـ بنت الـ

حكم إعتقال وتعذيب المطالب بالحرية في دولة اّل سعود

في دولة تدعي الحكم بما أنزل الله ..أريد أن أعرف حكم الشرع في إعتقال وتعذيب داعية حقوق الإنسان الإصلاحي الدكتور الهاشمي ومن هم على دربه، أم أنهم يعتبروه خروجا على الحاكم لإن الملك يحكم بما أنزل الله ... أم أن الهيئه والمفتي والقاضي يخافون ولي منصبهم أكثر من الله ... الساده السابقين أفتونا يرحمكم الله
مع العلم انا جسدي نحيل وميستحملش أكتر من خمس جلدات جزاء جرأتي في السؤال ..
رحم الله العز بن عبد السلام

حكمة الرئيس مبارك

أوباما أشاد بحكمة السيد الرئيس مبارك ومن قبله بوش الابن وكلينتون وبوش الأب ، كما أشاد بها رؤساء أوربا ، وسبقهم في الإشادة السادة حكام وملوك ورؤساء وأمراء وسلاطين وطرابيش الدول العربية ، عايز أعرف بقى فين أم الحكمة دي يعني ايه علامتها ، ايه الحكمه انه يتغير على امريكا اكثر من اربعة رؤساء كلهم أشادوا بحكمة السيد الرئيس وهو مازال يحكم مصر منذ 28سنة ولا تكون دي رأس الحكمة ، ولا تكون حكمة دي اسم واحدة قريبة الريس والكل طمعان فيها

مجرد سؤال لمن يهمه الأمر

قال عايزين يحجبوا المواقع الاباحية قال

أول القصيدة كفر ونقول :
طبعا دا في المشمش وعند أمه يا أدهم انهم يقدروا يحجبوا كم المواقع الاباحيه المهول دا

صدر قرار حجب المواقع الإباحيه بعد انتشار مواقع الحركات السياسية المعارضة و (كفــــــــاية ) على قد كده لكن هي حجه واضحه لحجب المواقع الي بتجيب صداع في الراس للنظام زي الفيس بوك واليوتيوب والمدونات والذي منه

وبعدين هيحجبوا ايه ولا ايه ولا ايه

عيل صغير لئيم يفرح جدا بقرار الحجب دا ويقول في سره : كده بابا مش هيقعد على الكمبيوتر خالص وهقعد ألعب لوحدي طول النهار

خد يا سيدي ويا ستي الاحصائيه دي عندك وعندها

فى كل ثانية - 3.075.64- دولار تنفق على المواد الإباحية 28.258- شخصا يشاهدون الإباحية على الإنترنت. 372- شخصا يكتبون كلمة إباحية فى مواقع البحث.

- كل 39 دقيقة: فيلم إباحى جديد يصدر فى الولايات المتحدة الأمريكية.
- عدد المواقع الإباحية 4.2 مليون ( 12% من مجموع المواقع).
- عدد الصفحات الإباحية 420 مليون.
- عدد مرات البحث عن الإباحية على موقع بحث 68 مليون بحث (25% من مجموع البحوث).
- عدد الرسائل الإباحية اليومية 2.5 مليون (%8 من مجموع الرسائل الإلكترونية).
- عدد مرات تحميل مواد إباحية شهريا 1,5 بليون تحميل (35% من مجموع التحميلات)
- عدد الزوار للمواقع الإباحية فى العالم 72 مليون زائر شهريا.
- مبيعات الإباحية على النت $4.9 مليار دولار
نقلا عن موقع أمريكى خاص بمحاربة الإباحية:
www.cyber-eddiction.com

طب أنا راضي ذمتكم وبالذاات الذمم الواسعه .. هل هما هيقدروا يحجبوها ؟

ومين دا الي يقدر يعملها دا كان الشعب خرج في مظاهرات تقلب نظام الحكم الشعوب العربية يا سيدي تقدر تستغنى عن الأكل والشرب والدوا لكن متقدرش تستغنى عن ازاي يستخدمو نصها الي تحت رجالة وستات دا حسب اخر احصائية ان العرب أكثر المستخدمين للمواقع دي وهكون حسن الظن واقول انها من باب التعليم وانت عارف بقى اطلبوا العلم ولو ....

طب ليه تتصرف الملايين على الموضوع وبرضه مش هيقدرو عشان الحاج البروكسي ربنا يخليه ، والبلد مش لاقيه لقمة العيش .. تبقى هي دي الأباحه فعلا ،،،
تعليق سريع على رقم ورد في الاحصائية : في أمريكا كل 39 دقيقة بيصدر فيلم إباحي ..

أكيد عشان كده هما متقدمين ;) واحنا عشان فالحين بنحجبها بس السؤال الوجيه هنا في أمريكا بيجيبوا ممثلين وصحه منين عشان ينتجوا الكم دا.. احنا شاطرين بس نتكلم على الرياده العربيه اهواحنا طلعنا يا سيدي متخلفين:D

عموما محدش يحمل هم بمناسبة فكرة الحجب عموما , اى حد عايز اى خدمة انا تحت امره ودي خدمه وهدية مجانية مقدمة من المدونة وصاحبها
وابقى سلميلي على المترو ومحدش يفهم صح

تعليقات عل الحكم الصادر بإعدام هشام طلعت مصطفى في قضية سوزان تميم

تعليقات فيسبوكيه

ماذا تتوقع في حكم قضية سوزان تميم ... ؟ أعتقد السكري إعدام وهشام مؤبد ... ! السكري لازم يختفي

بعد ربع ساعه محاكمه هشام طلعت مصطفي وبعد نص ساعه البورصه هتفتح وسهمه امبارح قفل علي 4.94 ربنا يستر
مش عارف ليه عنيا دمعة النهارده واتهزيت قوي من جوايا .. لما سمعت الحكم في قضية رجل الأعمال هشام طلعت مصطفى و الضابط السابق محسن السكري .. ومستغرب جدا من دا

تطلع مين سوزان تميم دي الي قتلها يخلي واحد زي هشام طلعت مصطفى أحد أهم أعمدة نظام مبارك ياخد إعدام في حين ممدوح اسماعيل قتل 1300 إنسان مصري ما بين طفل وشاب وامرأه وعجوز ياخد حكم بـ 7 سنين ويقضيه في لندن
الحكم بالإعدام على هشام طلعت ومحسن السكري في قضية سوزان تميم .... سبحان الله هو فيه رجال أعمال بيتعدموا يا جدعان !!!!!!

الحكم بالإعدام على هشام طلعت ومحسن السكري في قضية سوزان تميم والبراءة لضباط التعذيب و7 سنين لصاحب العبارة .تحيا العدل

هشام طلعت مصطفى و السكري ..يستاهلوا ..دي نهاية الفاسدين ماليا و أخلاقيا بس يا ترى ليه القضاء محكمش على وزير الصحة تاجر الدم الفاسد و قتلة مصريي العبارة بنفس الحكم ؟ يا بلد تغيظ

اغيب شويه اجى الاقى طلعت مصطفى اتحكم عليه بالاعدام ...ع العموم انا من وجهة نظرى ان الحكم هيتلغى فى النقض ...وان دى مجرد فرقعه اعلاميه لكسب تعاطف الناس ..لان الاولى كان اتحكم على صاحب العباره اللى تسبب فى قتل اكتر من الف روح برئيه بالاعدام العداله والعدل ميزان واحد مش اتنين العدالة زي الشعرة .. ساعة تروح .. وساعة تيجي

يا فتاح يا عليم .. إعدم يا عم إعدم .. اشمعنى الخنازير يعني

تحويل أوراق هشام طلعت مصطفى و محسن السكري لفضيلة المفتي والمفتي يرفض الحكم ؛ وتحديد جلسة 25/6/2009 للنطق بحكم الإعدام عليهم ؛ وبعدها من حق المتهمين بالنقد في الحكم

اعدام المجرم هشام طلعت مصطفى موعظة لكل المجرمين من امثالة

إحاله أوراق السكري و هشام طلعت للمفتي ... إمتي هنحيل ورق مبارك ويوسف والي وحبيب العادلي

نشنت ياعمرو يااديب:اهو هشام اتعدم شوف بقى مين ها يوزع حلاوة الحلقة الخاصة من القاهرة اليوم صباح اليوم من محكمة جنوب القاهرة

حقا القضاء صوت الله في الأرض .. الحكم بالأعدام لكل من هشام طلعت والسكري

في مفاجأة مدوية..إحالة أوراق هشام طلعت مصطفى ومحسن السكري إلى المفتي

الحكم بالاعدام على هشام طلعت و السكرى لرفع الحرج عن مصر و لكن فى الاستئناف هشام حبس خمس نجوم و السكرى إعدام و الأيام بيننا

ياناس قتيل الغرام مقتول و ساح دمه يا حزن أهله عليه .. يا طول عياط أمه

يعنى هو هشام طلعت لو كان صرف من جيبة كام مليون على حملات شعبية لإلغاء عقوبة الإعدام ، مش كان أنقذ نفسة من الموت ؟؟؟ ... عمل أية هو دلوقتى بالمليارات اللى حوشها ؟؟

احالة اوراق هشام طلعت مصطفى ومحسن السكري لفضيلة المفتي.. الاعدام لما يكون الحكم نهائي

يارب صبر اولادهم واهاليهم جميع المحكومين عليهم بألاعدام لان كثرة هذه الايام الحكم بالاعدام يعنى بمعدل على الاقل واحد كل يوم والتانى ده غير بالجمله با 10 و24 شخص مره واحده هذا وان دل يدل على كثرة العنف وعدم الاخلاق والضمير والقناعه والرضا والرحمه والانسانيه وربنا يستر ويلطف ويهدى

تفتكروا ممكن حكم الاعدام يتنفذ فـ هشام طلعت مصطفى ؟

الأهلي يغلب فى الوقت الضايع .. وهشام طلعت ياخد إعدام .. ده كتير يارب ألف حمد وشكر ليك يارب

احاله اوراق طلعت مصطفي والسكري للمفتي... ياريت كان فيه حد من ضحايا العباره او الدويقه فنانه عشان كان ياخدله اعدام .. مش كام سنه سجن ويهربوه بره البلد

إعدام هشام طلعت مصطفى اعدام السكرى بتاع امن الدوله اعدام حسنى مبارك .....لا ده لسه ماصدرش ضده الحكم

وأدى أعضاء لجنة السياسات هشام طلعت مشمصطفى خالص ربنا يتتم على خير ومايتقبلش النقض

هل لموت محمد علاء مبارك فضل في قرار تحويل هشام طلعت للمفتي

احالة اوراق هشام طلعت مصطفى الى المفتى no comment

ليه طلعت مصطفى قتل واحدة أخد إعدام .. وممدوح إسماعيل قتل 1300 أخد 7 سنين ..ليــــــــه ؟؟

فرحانة في الحكم بإعدام هشام طلعت لأنه همجي ..أما السكري فشمتانة فيه جدا لأنه حيوان أمن دولة

إعدام دا كلام إعدام يا سلام!!!!!!البراءة في النقض وأتحدى

إن كان القانون ومواده وجنحه وجناياته تقول أن قاتل واحدة يعدم .. وقاتل 1300 ياخد7 سنين وفى لندن .. فهو عدالة

عرجاء.. حلوة عرجاء ده

أحدهم يطالب بعفو رئاسى عن هشام طلعت لأنه من رموز الوطن
:D

عزاء واجب للرئيس ونجله

يا أيتها النفس المطمئنة أرجعي إلى ربك راضية مرضيه فادخلي في عبادي وأدخلي جنتي"

ببالغ الأسى والحزن وبقلوب مؤمنه بقضاء الله وقدره
يتقدم عبدالرحمن فارس
بخالص العزاء للسيد المواطن علاء محمد حسني مبارك في وفاة نجله محمد ويسأل الله أن يتغمد الفقيد برحمته وأن يرزق أهله الصبر والسلوان
كما يتمنى أن يعتبر الجد من موت الحفيد هذا إن كان له قلب

و أقول لجده الرئيس حسني مبارك البقاء لله وحده و لك في أطفال مصر ألف ألف حفيد
كل طفل في مصر حفيدك، لكن ليس لهم حظ حفيدك الراحل
أطفال مصر يا ريس لم يولدوا في قصور ولم ينالوا من الرعاية عشر معشار ما ناله حفيدكم الراحل
انظر الى مدارس الاطفال المصريين، أترضى لحفيدك أن يتعلم في هذه المدارس؟
انظر إالى الملاعب ومراكز الشباب، أترضى لحفيدك أن يلعب في مثل هذه الملاعب؟
انظر إالى المستشفيات، هل هذه مستشفيات تصلح لتداوي أوجاع المصريين؟
انظر إلى أطفال مصر يا سيادة الرئيس و اغدق عليهم كما اغدقت على حفيدك
أحيهم حياة كريمة تجد في عين كل منهم نظرة حب و امتنان كانت تسعدك من الراحل الصغير
أطفال مصر يكدحون في الحقول و في الورش وتحت السيارات
و إن لعبوا لا يلعبون الا في تراب دروب القرى والأحياء الفقيرة
أسعد أطفال مصر يا ريس و تطلع في وجوههم الضاحكة، تجد ابتسامة حفيدك
تجد في كل منهم محمد علاء حسني مبارك

تهنئه لمبارك بمناسبة عيد ميلاده

يحيا الرئيس للأبد يحيا هو الفرد الصمد له صفات ربنا لكنه له ولد

بعث السيد /عبدالرحمن فارس رئيس جمهورية نفسه والذي يحكمها منذ 28 سنة بالتهنئه للسيد / محمد حسني مبارك رئيس جمهورية مصر العربية الذي يحكم مصر منذ 28 سنه

صاحب الضربة الجوية الأولى
ورئيس السطلة التنفيذيه
والقائد الأعلى للقوات المسلحه
ورئيس هيئة الشرطة
ورئيس المجلس الأعلى للرياضه
ورئيس المجلس الأعلى للقضاء
والمسؤل الأول عن امن وسلامة البلاد
وصاحب الحق الأوحد في حل مجلسي الشعب والشورى
والمسؤل عن تعيين رئيس الوزراء وعزله هو وأي حد تاني
والمسؤل الاول عن إعلان حالة الطوارئ وإيقافها
والمسؤل الأول والأوحد عن عقد صفقات السلاح والتجاره فيها

وجاء في البرقية الاتي :

في عيد ميلادك الكام وتمانين كل سنه وانت طيب واحنا مش طيبين
كل سنه وانت نافخ واحنا منفوخين

متخفش وارحل عننا ......
واحب أن أطمئن شعبي الي هو نفسي بأننا في أنتظار ان ينفذ قضاء الله وقدره كي نريح أو نستريح

بيان رابطة مدوني الفيوم .. حول أحداث الفيوم الاخيرة

ويتواصل مسلسل الإنتهاكات ... وبين الضرب والسحل والألفاظ النابية وختامها الإعتقال

مازلنا بعد نحيا

فنحن هنا في الفيوم الآن
كما كنا في كفر الشيخ أمس
وكما كنا في الاسكندرية الصيف الماضي
وكما نحن في كل لحظة نعيشها في ظل هذا النظام

حلقة اليوم فيى الفيوم
وفيها حدثين رئيسيين ففي الجامعة كان إحتفالا لتوديع طلاب الفرقة الرابعة إبذانا ببدء مستقبل عملي في وطن جريح وصار إحتفالا مختلفا عن كل عام حيث رسموا هم ملامح هذا المستقبل على وجوه وأجساد الطلاب .. وكذلك في غرف السجون
الحدث الثاني تلى الأول بعدة أيام حيث كان الإحتفال بعد إنتصاف ليلة قمرية بعدد من الزيارات المتزامنة لعدد تسعة عشر منزلا وإستضافة تسعة عشر رجلا في صحراء دمو .. خلف قضبان دمو ومن بينهم أحمد محسن المدون وهو طبيب شاب يعمل حاليا في محافظة المنيا ويدرس الزمالة في الاشعة ولا يكاد يجد وقتا ليتواصل مع أهله وأصحابه أو حتى ليلتقط انفاسه ...

ولكن هذا ما كان .. ومازال كائنا ..

لنا لله ... لكي الله يا بلادي .. لكم الله الرحمن الرحيم يا ساكني السجون .. في كل بقعة في الوطن السجين

ولا نملك الآن إلا أن نقول وبأعلى صوت ... لن يستمر هذا الحال إلي الابد

رابطة مدوني الفيوم