Tuesday, March 23, 2010

سلامة مرارتك يا ريس .. بمناسبة خضوع الرئيس مبارك لعملية استئصال المرارة







سلامة مرارتك يا ريس
....
بمناسبة خضوع الرئيس لعملية استئصال المرارة


سلامة مرارتك يا ريس
يا فاقع مرارة مرات الفقير
فلا جوزها جايب
ولا الفقر تايب
ولا حتي سايب

مَيَّة في قُلة
ولا كوز في زير


سلامة مرارتك



سلامة مرارتك

مرارة العُـزاز
وإيه يعني إحنا

ما نِوْلع بجاز
إنتَ الحقيقة وإحنا المجاز
تفضلْ وييجي بدالنا البديل
شوية خباثة
وعوامل وراثة
نصبح بهايم ... ونصبح بديل
فتقدر ساعتها تنام مَلو عينك

ويعلى الشخير



سلامة مرارتك


سلامة مرارتك
سلامة المرارة
يا واقع علينا بسعر الخسارة
فلا فيه صناعة
ولا فيه تجارة
ولا فيه مدير
ولا فيه إدارة
ولا فيه وزارة تسيب الوزير


سلامة مرارتك
سلامة مرارتك

فداها المواطن
أبو قلب راطن كلام الهموم
فلا نفس راضية
ولا جتة فاضية
بلاوي وسموم
ولا علاج مداوي
مفيش غير حكاوي
بتاخد بإيدنا لآخر المصير


سلامة مرارتك
سلامة مرارتك
وألفين سلامة
يا سايب في كل المنازل علامة
مجاعة ... أنين ... كآبة ... ندامة
جهل وبطالة وعوالة وعيا
وفنون رخيصة وقِلِّة حيا
وهموم بتكتر ... وهموم تزيد
إنت في زيادة همومنا خبير


سلامة مرارتك
سلامة مرارتك
يا ابو القد فارع
يا مالي عنينا بزبالة الشوارع
أمال بندفع ضرايب لمين
شمالك بتاخد ...
وواخدة اليمين
شكلك بتحلف علينا اليمين
ما تجعل في جيبنا قليل أو كتير


سلامة مرارتك
سلامة مرارتك
دي واخدة الحصانة
بنشقى وتاكل علينا شقانا
لا خلِّيت أمامنا ولا فيه ورانا
ضرايب ... عوايد ... فاتورة ... رسوم
ننام بالفاتورة
وبيها نقوم
على البصَّة ندفع فاتورة لعِنينا
ولو نعمى ندفع فاتورة ضرير


سلامة مرارتك
سلامة مرارتك
يا صاحب الهمم
بخطبة بنطلع لأعلى قمم
وننزل على جدورنا بين الرمم
على الوهم ياما وياما بنينا
أوامر تجيبنا
أوامر تجينا
على خطوة واحدة في محلك نسير


سلامة مرارتك
سلامة مرارتك
إحنا فداها
تفرقع مرارتك
نفرقع وراها
حالنا بدونك عمره ما ماشي
إحنا بدونك شوية مواشي
من غير راعيها ... ومن غير كبير
سلامة مرارتك
سلامة مرارتك

8 comments:

ragabhpl said...

يابن الجامده يا نجم

سلامة مرارتك

تسلم ايديك يا عبدو

جميله اوى والله

شاعر سبيل said...

انت فين من زااان يا عبدو
والله نفسي اطمن عليك
بصراحة بى
انت اللي فاقع مرارتي
عشان مش عارف اشوفك

هند محسن said...

نجم دايماً يقول أشعار بلسان الشعب نفسه

زي قصيدته " يا شعبي حبيبي" كانت بتجنن زي " سلامة مرارتك"

المشكلة إنه مرارته هو اللي اتفقعت مش مرارة الشعب

ودي حاجة مخلياني استغرب جدا
بس ده ليه احتمالين:
إما أنه فعلا تعب مننا وقرفناه
وإما إن الشعب المصري قوة حديد وعزم شديد مش بيأثر فيه اللي بيعملوه فيه

هههههههههه
شكرا ليك يا فارس على القصيدة الجامدة دي

Unknown said...

جامدة اوي ياعبود والله هايلة تسلم الايادي وتسلم مرارتك في كل حين
وحشتنا اوي اوي وياريت نشوفك قريب

Unknown said...

القصيدة للدكتور أبوزيد بيومي عضو اتحاد كتاب مصر

لواء الاسلام said...

وألفين سلامة
يا سايب في كل المنازل علامة
مجاعة ... أنين ... كآبة ... ندامة
جهل وبطالة وعوالة وعيا
وفنون رخيصة وقِلِّة حيا
وهموم بتكتر ... وهموم تزيد
إنت في زيادة همومنا خبير
..
والله جامد ايه يا بني
يفقع مرارتك ايه الحلاوة دي

Anonymous said...

مش كفاية فقعتوا مرارة الراجل؟

Deborahxbgr said...

نجم دايماً يقول أشعار بلسان الشعب نفسه زي قصيدته " يا شعبي حبيبي" كانت بتجنن زي " سلامة مرارتك" المشكلة إنه مرارته هو اللي اتفقعت مش مرارة الشعب ودي حاجة مخلياني استغرب جدا بس ده ليه احتمالين: إما أنه فعلا تعب مننا وقرفناه وإما إن الشعب المصري قوة حديد وعزم شديد مش بيأثر فيه اللي بيعملوه فيه هههههههههه شكرا ليك يا فارس على القصيدة الجامدة دي