Tuesday, March 10, 2009

ليه إحنا بنحب مصر



مصر هي أمي نيلها هو دمي شمسها فـ سماري ... مش عارف ايه كده في ملامحي حتى لوني قمحي لون خيرك يا مصر

يا سلاااام ... صباح الوطنيه

في الخلفية موسيقى أغنية وبحبك وحشتيني للرائع حسين الجاسمي

عاش والله الي كتب الكلمتين دول منتهى الإندماج بين المواطن المصري ومصر ، مصر أمي والنيل دمي وشكلي ولوني وكل حاجه مختلطه بمصر

بس اشمعنى مصر ؟
ما أرض الله واسعه وكلها أرض الله !!
ليه بقى مصر بالذات ؟؟
ليه حتى لو ربنا سهلها ولقينا نفسنا في حته تانيه من أرض الله الواسعه بنحس بحنين لمصر؟
وتبقى في ايدينا كل حاجه وعنينا تتملى من كل حاجه وقلبنا يفضل في مصر !!

تعود للخلفية مرة أخرى أغنية وبحبك وحشتيني للرائع حسين الجاسمي

وتلاقي يا أخي المصري على قهو في اسطانبول ، أو في جنيه في لندن ، أو تحت شمسيه في مطعم طلياني فوق الجبل
والدنيا من حواليه نضافه وزوق ولطافه وحاجه تغيظ على رأي عمنا (بيرم التونسي)
وتلاقيه برضه بيقول : بس مصر بنت الكلب وحشتني .

لو كان الوطن مجرد مكان ناكل فيه ونشرب ونتناسل على أرضه - نتجوز ونجيب عيال يعني - كان يبقى أي مكان في الدنيا أحسن من مصر
لان نص دول الكره الأرضيه على الأقل أكلها وشربها وستاتها ورجالتها كمان أحلى من مصر :)

تبقى مش المنفعه لوحدها .. أكيد في سر تاني

.. تركيا هي أمي وأي نهر من الأربعين نهر الي فيها هو دمي وشمسها فـ سماري برضه ... ومش عارف ايه كده في ملامحي حتى لوني قمحي لون خيرك يا تركيا
اه مهي تركيا بتزرع القمح فعلا مش بتستورده

بس مش ماشيه برضه ، فيه حاجه ناقصه ، مصر بنت الكلب الي في قلبي دي اعمل فيها ايه ؟

حتة الصحرا الي واقعه في ملطش للي رايح والي جاي يحتلها ، والي الفرص فيها بالقطاره والقطاره مش في ايدينا كمان
والي بقت عامله زي مقاولة الهدد كل عيل شايل منها قالب طوب وبيجري
وحتى الشعب الي لونه قمحي والي كان مالي الدنيا ضحك بقى دمه تقيل ...
ليه بقى حازه فـ نفسي كده ؟
ليه مش عارف استأصل نفسي منها أو استأصلها من نفسي ؟

مراية الحب عامية
دا صحيح
عاميه وبنت كلب كمان
مهو حبيبتك مثلا مش ممكن تكون أحلى بنت في الدنيا
الواحد مننا بيحب قرده وبيتهيأله لو غابت عن نظره هيروح فيها
والدنيا كلها واصحابه وأهله يبقوا شايفين إنها (صندل) ما عدا هو يبقى شايفها ملاك نازل من السما وماشي ع الأرض وخساره فينا إن إحنا نبص على جمالها

ويمكن تكون هي دي المشكله

إننا بنحب مصر وبنطلتش في غرامها
قبل ما نعرف إن فيه بلد تانيه اسمهااااا تركيا

بنحب القهاوي بتاعتها قبل ما نسمع عن قهاوي باريس

بنحب ترابها قبل ما نعرف ان فيه اوطان تانيه نضيفه مفيهاش تراب أصلا

وبندهول في غرام (التابعي و اخر ساعه) - مطاعم فول وطعميه مشهوره - قبل ما نعرف ان مطاعم إيطاليا فيها أكل بني ادمين
وان الفول والطعميه والمسقعه دي أصلا علف :)

وبنعشق هواها قبل ما حد يقولنا ان احنا عايشين جوه واحده من أكبر بؤر التلوث في العالم كله

وبنحب بنت الجيران أو زميلتنا في الجامعه قبل ما نفوق على الحقيقه المره إن نسبة الذكور في مصر 100%100 :)

وبنمشي في الدنيا ومصر متعلقه في دراعتنا واحنا فاخورين بيها وفراحنين وحاسيين إنها ملاك نازل من السما وماشي على الأرض وخساره في أي حد أنه يبص على جمالها

قال والناس كانت فاهمه ان حب الوطن حسابات بتحصل في العقل اتاريه طلع غرام في غرام في غرام وكل الي فاهمه منه ان لما سيرة مصر بتيجي في الكلام جسمي بيقشعر وشعر ايدي بيقف وبحس ان دمي اتحرق

يسلااااااااااام يا ولاد دا حب مصر ... حب مصر طلع فيه هرمونات اكتر من هرمونات البلوغ والمراهقه والحب الأول

وكل يوم بحبك أكتر من الي فات ، مش عقل ولا مصالح دي بس هرمونات

وتستمر أغنية الرائع حسين الجاسمي وبحبك وحشتيني في الخلفيه لحد ما النوم يكبس


................

مع تحيات

تيت : صوت الجاليه المصريه في مصر

5 comments:

سجود المشهراوي said...

يلا يمكن أكون أول واحد يعلق

هدا طبعا حب البلد حتى لو كانت "زفت " بيكون فطرة في كل بني ءادم

يعني احنا بفلسطين الي مو طايلين منها شي لا سهل ولا صحرا ولا بحر بنحبها وبنموت فيها ومش بنرضى نعيش بأحسن
مكان بالدنيا حتى لو كانت تركيا

مصرية said...

انا أول مرة أفوت مدونة حضرتك بالخطأ يعني مش مقصودة

بس ايه ده يعني بنات مصر كده بمخيلتك كلهم ذكور ؟؟؟؟

طيب أنا مش بأسمحلك خالص ولو سمحت ابقى احترم الآخرين ولو كنت حضرتك حابب قردة مش ضروري يكونو كلهم قرود

مع تحيات بنت من قلب مصر "أنثى "

مهندس مصري said...

دا أنا بأعد الأيام و الثواني علشان أرجع لها
فاضل لي شهر و أنزل أجازة
يارب يفوت بسرعة

mohamed said...

فهرس المدونات
مدونه بها دليل لجميع المدونات العربيه

اشترك معنا
فرصه لاشهار المدونات
اعلن عن مدونتك معنا مجانا
فكرت فى عمل مدونه تجمع كل المدونات فاذا اردت الاشتراك معنا
اترك تعليقا متضمنا
1-اسم المدونه
2-ملخص عام عن مدونتك
3-عنوان المدونه
4- اسمك
5- ايميلك

Voyger said...

تفسير يستحق الاهتمام .. يبدو ان المسألة الوطنية هذه لها علاقة بالحمية و الانفعالات اكثر من اي شي اخر